120

૧૨૦ - "સંપૂર્ણ થયું"

૧૨૦ - "સંપૂર્ણ થયું"

	હર્ષધ્વજા
કર્તા:	મહીજીભાઈ હીરાલાલ
૧	દેવે કર્યો પ્રેમ શો વિશ્વ પરે, કે વિશ્વને પુત્રનું દાન કરે !
	પુત્રે કૃપાથી બલિદાન કર્યું; હાલેલૂયા ! દાન સંપૂર્ણ થયું.
૨	દેવે કહ્યું વેણ જે આદમને, ત્રાતા ઈસુ તારશે માનવને;
	સમયે પ્રભુએ પૂરું વેણ કર્યું; હાલેલૂયા ! દાન સંપૂર્ણ થયું.
૩	આવ્યો ઈસુ વિશ્વમાં દેહ ધરી, ગાળી શુચિ જિંદગી પ્રેમભરી;
	ને થંભ વેઠી પરિત્રાણ કર્યું; હાલેલૂયા ! દાન સંપૂર્ણ થયું.
૪	થંભે ઈસુએ મહા દુ:ખ સહ્યું, એ દુ:ખનું બ્યાન ના જાય કહ્યું;
	પણ એ જ દુ:ખે ખરું સુખ કર્યું; હાલેલૂયા ! દાન સંપૂર્ણ થયું.
૫	રે સર્વ લોકો, જયકાર વદો, ફાડી ગયો ભિન્નતાનો પડદો;
	ખ્રિસ્તે, જુઓ, થંભથી ઐક્ય કર્યું; હાલેલૂયા ! દાન સંપૂર્ણ થયું.
૬	ઊઠયો ઈસુ ઘોરમાંથી વિજયે, સ્વર્ગે સિધાવ્યો પૂરું કાર્ય થયે;
	રે આપણે કાજ સૌ કાર્ય કર્યું, હાલેલૂયા ! દાન સંપૂર્ણ થયું.
૭	આભાર માનો સદા ખ્રિસ્ત ભજી સંપૂર્ણ થાઓ બધાં પાપ તજી;
	જે જોઈએ તે ઈસુએ જ કર્યું; હાલેલૂયા ! દાન સંપૂર્ણ થયું.