76

૭૬ - દયામય સ્વામી

૭૬ - દયામય સ્વામી

છંદ :	ચોપાયા
રાગ પદ :	ધનાશ્રી કે ભીમપલાસ
(મિશ્ર તાલ :	કેહરવા)
કર્તા :	કા. મા. રત્નગ્રાહી
૧	સ્વરનું સુખ તેં મૂકી દીધું, માનવ દુ:ખ નિહાળી;
	નભથી ભૂ લગ નીચો થઈને, છેક થયો તું ખાલી.
ટેક :	જય જય ખ્રિસ્ત દયામય સ્વામી.
૨	તું ધનવાન છતાં નિરધન થઈ આવ્યો આ જગમાંહી;
	સ્વર્ગભુવનનો રાજકુંવર તે, દીનપણાને ગ્રાહી. જય.
૩	માતા મરિયમ પેટે જન્મી માનવદેહ તેં ધારી;
	નમ્ર ગભાણે પોઢી, વ્હાલા, કોમળ, કોમળ કાયા તારી. જય.
૪	આ જગ માંહે વાસ કરીને જનહિત કાર્યો કીધાં;
	અંધા, પંગા, ચંગા કીધા, અંગ પરિશ્રમ લીધા. જય.
૫	પ્રેમ દયાથી નિશદિન વરતી શુભ ઉપદેશ જ દીધો;
	તોપણ જગતે અંધ બનીને નાથે ન માની લીધો. જય.
૬	મુજ પાપે બહુ પીડિત કીધો, વીંધ્યાં અંગો તારાં;
	ગાઉં નિરંતર તુજ ગુણ-ગીતો, પરમ પ્રિય પ્રભુ મારા. જય.