SA430

૧	પ્રભાતનો પ્રકાશ જાણે, દિન દીસે દીપતો; હા, જ્યોત જેવો ઝબુકતો, ને સૂર્ય જેવો શોભતો; ઊઠો, તમે આનંદ કરો, આ જન્મ દિવસ આવીયો, રે, પ્રીત પાપી પર કરી, ઉદ્ધાર સાથે લાવીયો.
૨	રે, ભાણ જેવો ભૂપતિ, ઉદય થયો છે ભૂતળે; તે નાથને નિહાળતાં રે, તાપ તનના સહુ ટળે; ગભાણમાં તે ભાણ જૂઓ,જ્યોત જેવો દીપતો, દાઉદ કેરા શહેરમાં, આનંદ અદકો રે થતો.
૩	સન્નારીઓને, સેવકો સહુ સાથમાં ત્યાં જાય છે; ત્યાં પૂર્વ કેરા માગીઓ, લળી લળી ગુણ ગાય રે; ચાલો સૌ જોવા જઇએ, સહુ સાથમાં તે નાથને, આહીરડા ઉમંગથી, ચૂંબન કરે છે હાથને.
૪	સહુ કષ્ટને રે નષ્ટ કરવા, નાથ આવ્યો પ્રીતમાં, વહાલથી, શુદ્ધ પ્યારથી, રે રાખો સર્વ ચિત્તમાં; વધામણી વ્હાલા તણી, પ્રગટ કરો સહુ દેશમાં, ભૂપાળ ભીડો ભાગશે, આવ્યો છે માનવ વેશમાં.