171

૧૭૧ - ખ્રિતની અનુપમ પ્રીતિ

૧૭૧ - ખ્રિતની અનુપમ પ્રીતિ

	હરિગીત
કર્તા:	દાનિયેલ ડાહ્યાભાઈ
૧	હે ખ્રિસ્ત ત્રાતા, ત્રાણદાતા, વિશ્વવિધાતા ધણી,
	હું અલ્પ પ્રાણી સ્તુતિ તારી શું કરું મુખથી ઘણી;
	તું ત્રાણકારી, શોકહારી, શુખકારી છે પતિ,
	પ્યારા પ્રભુ, પ્રેમાળ તારી પ્રીત ન્યારી છે અતિ.
૨	છે નાથ તું જ અનાથનો, સહુ સૃષ્ટિ કેરો આશરો,
	તું સર્વથી પરિશુદ્ધ છે, પરિપૂર્ણ પ્રીતિનો ઝરો;
	જન કોઈ પણ નહિ પામશે તવ પાર પ્રીતિનો રતિ,
	પ્યારા પ્રભુ, પ્રેમાળ તારી પ્રીત ન્યારી છે અતિ.
૩	તેં છેક છેલ્લે પ્રાણ તારો અમ કાજ તો અર્પી દીધો,
	સ્વીકાર એ સહુ દુ:ખનો અમ પાપીઓ માટે કીધો;
	એ શ્રેષ્ટ પ્રેમાભાર તવ ભૂલીશ નહિ મમ દિલથી,
	પ્યારા પ્રભુ, પ્રેમાળ તારી, પ્રીત ન્યારી છે અતિ.
૪	શાંત્યાસ્પદ તવ પ્રીત છે, નહિ તૂટશે, રજ ખૂટશે;
	તે પ્રીત જે જન પામશેમ, દુ:ખ વામશે, સ્વર્ગે જશે;
	ગુલતાનમાં દિન ગાળશે, દુ:ખ ભાળશે નહિ ત્યાં રતિ,
	પ્યારા પ્રભુ, પ્રેમાળ તારી પ્રીત ન્યારી છે અતિ.